الرئيسية / المقالات / المدير الجديد
11

المدير الجديد

استيقظ “صعفوق” فوجد رسالة من صاحب الحلال
ورئيس مجلس الإداره الشيخ أبو عبد الله

“السلام عليكم
سامي ماراح يكمل معانا وأنت راح تكون المدير للشركه
أتمنى لك التوفيق”

صعفوق متفاجئ : ياساتر مدير مره وحده !!
الحين كيف أسوي مع خوياي بالدوام ؟ كيف أعاملهم ؟
كيف راح تكون شخصيتي الجديده؟

خرج “صعفوق” في الصباح بعدما مرّ المغسله وكوى ثوبه وشماغه ولمع كنادر العيد واستغنى عن النعول الزبيريه اللي عرف فيها

وعندما وصل إلى الشركه قابله مندوب البنك أبو متعب وهو يضحك :
احلى يالمدير وش هالكشخه والنظارات والله منت سهل
بس بصراحه أنا فرحت لك والله قلت يستاهل صعفوق

صعفوق : شكرا ياابو متعب بارك الله فيك ويمشي ويتركه
يستغرب أبو متعب : وشبلا صعفوق صاير كنه مدرس ابتدائي ؟

يجلس صعفوق على المكتب الفخم ويدخل عليه الفراش الباكستاني :
أحلى مدير كبير الحين ياصعفوق
هذا شاي بس عشان مدير
انت اليوم ميه ميه
يرد صعفوق بدون ابتسامه : بارك الله فيك يامرخان خلاص نزل الشاهي
مرخان يطالع لصعفوق وهو مبتسم ومستغرب !!

فجأه يدخل الموظفين على صعفوق يباركون له ومعهم حلى وقهوه ، وسلطان يقول :
تعيين صعفوق ماهو خبر عادي قلنا لازم نجيب حلى وقهوه
ونقهويك والموظفين من وراه وبصوت واحد : أي والله كفو

بعدها يضعون القهوه وصحن الحلى على طاولة المدير العام “صعفوق”
طبعا منصور مالقى كرسي فاضي فجلس على طاولة المدير ووجهه مقابل صعفوق

المكتب الحين مزدحم والحلى نصفه مأكول وضحك وصراخ ونكت وأصوات الموظفين واصله الشارع
وصعفوق يحاول يلقى له مدخل عشان يفرض سيطرته ويرجع الأمور مثلما كانت

وأثناء تفكيره يضرب سلطان على كتفه ويقول :
الحمد لله اللي الله فكنا من المدير النجس “سامي” ياهو معقد والله اننا فرحنا انك صرت مدير ياصعفوق طيبة قلب وحبابه والله إنك أبرك منه

صعفوق يبتسم مجامله لسلطان وفكره يسرح بعيد يتذكر ماضيه بالشركه وكيف كان معروف بالضحك والتنكيت
حتى تعود الموظفين على شخصيته المرحه الهزليه
ويتسائل في نفسه : كيف الحين أقدر أغير انطباعهم عني

فجأه يدخل عليهم مرخان وهو يقول : بابا الشيخ أبو عبد الله جاء
فيرتبك الموظفون ويحاولون ينظفون لكن يد صالح نثرت الفنجان على الطاوله وتبلل خطاب وزارة العمل اللي كان الشيخ موقع عليه ومن المفترص انه يروح للوزاره بدري
يصرخ الموظفين : الخطاب الخطاب

يدخل  الشيخ ويرى أمامه هذا المنظر الغريب :
صعفوق واقف
وخطاب الشيخ مبلل بالقهوه
والمكاتب فاضيه
وكل الموظفين مجتمعين عند صعفوق
والحلى مأكول
يصمت الشيخ ويدخل مكتبه ويسكر الباب

بعد 6 دقايق يجي سكرتير رئيس مجلس الإداره ومعه خطابين :
الأول / تعيين “صالح” مدير عام لشركه البزابيز المحدوده
الثاني / الاستغناء عن الموظف “صعفوق” وإنهاء خدماته

ملاحظة :
* لسبب (ما) فإن لغة القصة ليست أفضل حالاً من صعفوق

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *